ជូនពរឆ្នាំថ្មី ឆ្នាំមមី (កំណាព្យ បទពាក្យ៧ )

ជូនពរឆ្នាំថ្មី ឆ្នាំមមី (កំណាព្យ បទពាក្យ៧ )

១.ជូនពរឆ្នាំថ្មី ឆ្នាំមមី      សូមខ្មែរគ្រប់ទីជួបសុខា       ​          សូមកើតកើនទ្រព្យគ្រប់គ្រួសារ              លុយឡានវីឡា ស្នេហាស្មោះ។

២.សូមឲ្យឆ្នាំថ្មី ជោគជ័យថ្មី      ខ្មែរទាំងប្រុសស្រី គ្រប់កៀនកោះ                        មុខខ្មូតប្រែល្អប្តូរសម្រស់                    សម្ផស្សឥតខ្ចោះឥតក្រោះក្រៀម។

៣.សូមឲ្យគ្រោះកាចនៃឆ្នាំចាស់    អ្នកធ្លាប់កាចឆ្នាស់ ប្រែស្លូតស្ងៀម             អ្នកដែលខ្វះគូកុំទីងទាម                            ប្រឹងសង្វាតភ្លាម ស្វែងរកស្នេហ៍។

៤.សូមឲ្យបានសុខគ្រប់ប្រការ           អ្នកក្រុងអ្នកផ្សារចម្ការស្រែ                      នាម៉ឺនមន្រ្តីកុង្សីផែ                                      គ្រប់ក្រសួងខ្មែរថែថ្កើងថ្កាន។

៥.សូមឲ្យជោគជ័យលើសត្រូវ                  ដែលតែងអាស្រូវទាស់រំខាន                    សូមឲ្យគ្រោះភ័យទំាងប៉ុន្មាន                        ចាកចេញឲ្យបានពីកម្ពុជា។

៦.ខ្ញុំសូមបួងសួងវត្ថុសិទ្ធ                          ជួយរក្សាពិតខ្មែរគ្រប់គ្នា                          សូមឲ្យសប្បាយគ្រប់អង្គារ                          គ្មានគ្រោះយីយាលើអ្នកឡើយ។

៧.បើសិនអ្នកឈឺឲ្យជាសះ អ្នកដែលព្រាត់ប្រាស់ជួបកៀកកើយ​សាងស្នេហ៍ផ្អែមល្ហែមទ្រូងល្ហែល្ហើយ      រួមរស់លើត្រើយមង្គលា។

                                                          (  ០៩ មេសា ២០១៤ )